पुणे जिल्हा प्रतिनिधी. हर्षल मुथा
पुणे :कोंढवा बुद्रुक येथील अश्रफ नगरमधील महावीर डिलाईट सोसायटी परिसरात आज (१५ ऑगस्ट) दुपारी महावितरणच्या हलगर्जीपणामुळे अत्यंत धक्कादायक आणि गंभीर घटना घडली. मुसळधार पावसात रस्त्यावर साचलेल्या पाण्यात अचानक उच्च दाबाचा विद्युतप्रवाह उतरल्याने दोन निष्पाप कुत्र्यांचा जागीच तडफडून मृत्यू झाला. या घटनेमुळे संपूर्ण परिसरातील नागरिकांमध्ये तीव्र संताप आणि प्रचंड भीतीचे वातावरण पसरले आहे.
मिळालेल्या माहितीनुसार, दुपारी १२:३० ते २:०० वाजण्याच्या सुमारास जोरदार पाऊस सुरू असताना महावीर डिलाईट सोसायटीच्या लगतच्या जमिनीतून व साचलेल्या पाण्यात विजेचा प्रवाह वेगाने पसरला. या पाण्यातून जात असताना विजेचा जोरदार धक्का बसून दोन भटक्या कुत्र्यांचा जागीच मृत्यू झाला.
नागरिकांमध्ये भीतीचे सावट व महावितरणवर रोष
मोठी जीवितहानी टळली: सुट्टीचा दिवस असल्याने रस्त्यावर लहान मुले किंवा नागरिक ये-जा करत होते. हा विद्युतप्रवाह माणसांच्या संपर्कात आला असता तर मोठी जीवितहानी झाली असती, अशी भीती रहिवाशांनी व्यक्त केली आहे.
भोंगळ कारभारावर प्रश्नचिन्ह: घटनेची माहिती मिळताच महावितरणचे कर्मचारी घटनास्थळी दाखल झाले आहेत. मात्र, पावसाळ्यापूर्वी वीजवाहिन्यांचे आणि भूमिगत तारांचे योग्य मेंटेनन्स का केले नाही, असा थेट सवाल संतप्त नागरिक विचारत आहेत.
तातडीने उपाययोजना करण्याची मागणी: पावसामुळे आणखी कुठे असा करंट उतरला आहे का, याची संपूर्ण तपासणी करून कायमस्वरूपी दुरुस्ती करावी, अशी जोरदार मागणी स्थानिक नागरिकांनी केली आहे.
महावितरणने केवळ तात्पुरती मलमपट्टी न करता परिसरातील सर्व उघड्या तारा व अर्थिंगची सखोल पाहणी करावी, अन्यथा भविष्यात घडणाऱ्या संभाव्य जीवितहानीस महावितरणच जबाबदार राहील, असा इशारा सोसायटीतील रहिवाशांनी दिला आहे.
